Skip to main content

चौपाड़िक यात्रा-कथा

पछिला लगभग पाँच बरखक सक्रीय सामाजिक आ साहित्यिक जीवन मे सब सँ बेसी जे सहयोग केलक ओ अछि फेसबुक। फेसबुके के दुआरे हमरा कैकटा प्रिय  मित्र भेटलाह आ एहि मित्र सबहक सहयोग सँ शुरू भेल साहित्यिक चौपड़िक यात्रा। 

नवल श्री 'पंकज' आ बालमुकुंद पाठक सँ भेंटघाँट आ परिचित भ' मित्रता भेलाक बाद हमरालोकनि विचार भेल जे पटना मे जे आइ-काल्हि हमरा सबहक तूर के युवा लेखक सब सक्रीय छथि तिनका सब सँ परिचय-पात आ भेँट-घाँट कोना हुए आ से नियमित रूप सँ। ताहि हेतु नियार-भास शुरू भेल। लगभग तीन मास तक हम सब विचारिते रहलहुँ। 

मुदा से एक दिन हमरा तीनू के खूब उजाहि उठल। सहमति बनल जे आइ राति सब गोटे संगे रहि एहि मामिला के फाइनल कइये देबैक। ओहि राति त' नहि मुदा परात भेने समयक तय-तमन्ना भेल आ तकरा बाद हमरालोकनि पंकज भायक मैनपुरा स्थित आवास पर साँझखन पहुँचि गेलहुँ। 

करीब 10 बजे सँ भोजन बनब प्रारम्भ भेल आ संगहि आरम्भ भेल एकटा नियमित मासिक बैसार के नियार-भास। खने किछु नाम आ नियम बनय खने किछु। एहि सब घमर्थन मे भोजन बनल आ सब गोटे भोजन क' बैसि गेलहुँ कागत-कलम ल'। हमरा कने सवेरे-सकाल सुतबाक हिस्सक अछि। कतेको बेर चाह पीलाक बादो जखन निन्न नै सम्हरल त' दुनु मित्र केँ निहोरा करैत हम सुतबाक आज्ञा मंगलहुँ। दुनु मे सँ कियो तैयार नहि भेलाह। आब हम फसलहुँ भारी फेरा मे। मोन मे हुए जे कोन सुकर्म केने रहि जे भगवान एहेन फेरा मे फँसेलाह। अंतोगत्वा नहिए जागि सकलहुँ आ रकन्ना क' सूति रहलहुँ। 

एम्हर ई दुनु भरि राति एहि मामला पर नियार-भास करैत रहलाह। भोर मे लगभग साढ़े पाँच बजे पंकज जी चाह पीबा लेल उठबैत कहलाह जे नामक नियार भ' गेल। 'से की'- हम पुछलियनि। बालमुकुंद कहलाह- 'साहित्यिक चौपाड़ि'। हम औंघायले रही तैं कहलियनि जे बहुत नीक। बाद मे भक्क खुजलाक बाद पुछलियनि जे ई सब कोना-की भेल राति मे आ ई नाम कोना फुरायल? 'असल मे चौपाड़िक माने होइत छैक सत्संगक अड्डा' - बाल भाइ टिपलनि। 'अपना सब साहित्यक सत्संग करबै यौ', हम पुछलियनि। एहिये सब हँसी-ठठ्ठाक संग फाइनल भेल नाम। नियमक मादे हमरालोकनि नियारलहुँ जे अनेरेक औपचारिकता आ नियम-कानून सँ एकरा फराक राखल जाय। बस कानून मे कानून रहल जे एहि मे सिर्फ मैथिलीक रचना चाहे मौलिक होइक वा अनुवाद, कविता होइक वा कथा, आलोचना होइक वा संस्मरण सब विधाक रचना पढ़ल जायत। हम सब गोटे सहमत छलहुँ एहि सँ। जगह फाइनल भेल गाँधी मैदान आ तारीख 8 अगस्त 2015। 

पटनाक सब नव आ पुरान रचनाकार सबकेँँ यथायोग्य-यथासंभव खबरि कयल गेलनि। सात गोटे आयल रहथि पहिल बैसार मे। उपस्थिति त' सहजे कम छलैक मुदा हुलास बड्ड भेल हमरा तीनू केँ। एकटा स्वप्न जीवंत रूप लेने छल। शनैः-शनैः एहि गोष्ठीक यात्रा चलैत रहल आ लोक सबहक अबरजात लागल रहल। शुरू मे हमरा सब केँ एहि बातक सब सँ बेसी चिंता हूए जे कोना सब वरिष्ठ आ नव रचनाकार सब अयताह। हम सब विचार करी जे जँ सब वरिष्ठ रचनाकार सब औताह त' कतेक मार्गदर्शन भेटत हमरा सब सन नवतुरिया केँ। कतेक नीक सँ दू टा अलग-अलग जेनरेशन केँ एक ठाम बिना कोनो खर्च-बर्च केँ बैसा साहित्यक स्कूलिंग कयल जा सकैछ। 

से तीन-चारिटा गोष्ठीक बाद अग्रज सब आबय लगलाह आ हम सब खूब हरखित होइत रहलहुँ। पछिला एक बर्ख मे तेरह टा आयोजन भेल साहित्यिक चौपाड़िक। आब एक बर्ख के बाद जखन पाँछा घुरि तकैत छी त' एकटा नियमित लोकक पतिहानि भेटैत अछि जाहि मे सब कियो सदैव सहयोगक मुद्रा मे पीठ पर ठाढ़ भेटैत छथि। हमरा जनैत एहि अनौपचारिक गोष्ठीक सब सँ पैघ सफलता अछि किछु युवा लेखक केँ मैथिली मे अप्पन कलम चलेनाय आ अप्पन भाषाक प्रति भेल झुकाव। एकटा आर प्रसन्न होयबाक गप्प अछि जे एहि गोष्टिये जकाँ दरभंगा आ दिल्ली मे सेहो एहिये नाम सँ एहने नियमित बैसार शुरू होयब। 

मैथिलीक समकालीन सन्दर्भ मे जे हमरा सब केँ अप्पन अग्रजक स्नेह भेटनाय बंद भ' गेल छल पछिला किछु बरख सँ आ तैँ एकटा ऑटोमैटिक कम्युनिकेशन गैप भ' गेल छल, से आब भरि रहल अछि। ओनाहुयो अग्रज पीढ़ीक अनुभव आ नवतुरियाक ऊर्जा जँ एक ठाम होइक त' निश्चित रूप सँ आबय बला समय मे मैथिली मे कतेको सक्कत आ ससक्त लेखकक आगमन होयत आ ओ लोकनि मैथिलीक उज्जवल साहित्यिक भविष्य मे सहायक होइत जयताह। मैथिलीक एहि उज्जवल आ ऊर्जस्वित भविष्य-निर्माण मे जँ 'साहित्यिक चौपाड़ि' एक्कहु टा ख'ढ़ लगा सकल त' हम सब अपना केँ सफल मानब। एखनधरि जीवन मे विधाता कहियो असफल नहि केलनि त' आशा करैत जे एहियो मे सफल होयब।

आ से हेब्बे करब !

(ई आलेख 'साहित्यिक चौपाड़िक' पहिल वार्षिक पत्रिकाक संपादकीय अछि)
लेखक :- गुंजनश्री

Comments

चर्चित पोस्ट

तीन टा मैथिली कविता - गुंजनश्री

1. रहना नहीं देश वीराना है

मीत !
कोना रहब पार लगैत अछि
ओहि नगर मे जाहि ठामक
सुरुज गछारल हो
मोन झमारल हो
किरण जे अबैत हो चानि पर
गिरहथ विर्त हो
लगेबा लेल ताहि पर
रंग-बिरंगक फिल्टर

झूर-झमान होइत लोक जतय
बाट तकैत हो दिन घुरि अयबाक,
झुझुआन होइत जाइ जतय
सरोकारक अनिवार्य मुदा हेराइत संस्कृति ,
लतखुर्दन कयल जाइत हो जतय
लोकतंत्रक सबटा गुण-धर्म
आ एहि सभ पर
मुस्की छिड़ियबैत हो सिंहासन
भाभाक हँसय ओकर चौदहो देबान,
कमला बलान मे संविधान केँ
दहा देबाक लेल रचल जाइत हो
नित-नव व्यूह,

एहि व्यूहरचनाक ओस्ताज सबहक नगर मे
कतेक दिन बाँचल रहि सकब हम-आहाँ मीत
चलू ने कोनो आन ठाम
जतय दिन
असगन्नी पर ओलरल नितुआन
मैल-कुचैल निरासि देल गेल अंगा सँ फराक
अपन अस्तित्व गढ़बाक व्योंत मे हो
आ राति
नढ़ियाक भूखब सुनबाक अभ्यस्त कानक रकबा सँ
अपना केँ एकात क'
चन्द्रमाक आभा मे नहयबाक सूर-सार करैत हो...


2. एना किएक करैत छलाह ओ ?
एहि शताब्दीक माथ पर अप्पन समस्त उर्जाक साक्षी राखि अपन आबय बला पीढ़ीक लेल करय चाहैत रहथि ओ एकटा दसखत जकरा देखि कहल जा सकैछ जे ई पुरखा छलाह हमर जे नहि अबडेरलाह कहियो कोनो राजनितिक क्षत-विक्षत नीति केँ
हुनका आजीवन…

मिशन भाइसाहेब : दू पड़ाव (संस्मरण) - डॉ. कमल मोहन चुन्नू

पहिल पड़ाव : छाड़इत निकट नयन बह नीरे
साहित्यमे हमर प्रवेश भेल नाटक बाटे। प्रारम्भ हम नाटकेसँ कयल। पटनाक मैथिली रंगमंचसँ। प्रायः 1990-91 सँ। अभिनयक रुचि अवश्य छल मुदा से प्रधान नहि। नाटकक अन्य पार्श्व-सहयोगी तत्वसभ आकर्षित करैत छल। ताहूमे एकर संगीतपक्ष सर्वाधिक। नाटकक साहित्य आ संगीत दुनूक अपन-अपन भाषा छैक। एहि दुनूक अपन-अपन सौन्दर्य-प्रभावादि आ संगहि एहि दुनूक अंतर्सम्बन्ध हमरा बेर-बेर आकर्षित करैत छल। ग’र लगने किछु काजो करैत जाइ। गोटपगरा लोक प्रशंसो करथि। तहिया पटनाक मैथिलीओ रंगमंच बेस सक्रिय छल। एकर प्रदर्शन-क्रममे निरन्तरता छलैक। मैथिली रंगमंच आ एकर गतिविधिक प्रमुख केन्द्र विद्यापति भवन होइत छल। एतय रंगकर्मीलोकनिक जुटान नियमित भेल करय। हमहूँ पहुँचय लगलहुँ। मंचनमे प्रत्यक्ष-परोक्ष सहयोग करय लगलहुँ। आ एहिये मंचनसभक दर्शक-दीर्घामे मैथिलीक समस्त साहित्यकारलोकनिकेँ देखय लगलहुँ।
श्री शरदिन्दु चौधरीजीसँ हमर सम्पर्क भेल। ओ ‘समय-साल’सँ हमरा जोडि़ लेलाह। यद्यपि समय-साल लेल हम बड़ बेसी नहि लिखलहुँ मुदा एकर उपलब्धि ई भेल जे नाटकसँ इतर एकटा नव साहित्यिक बाट देखबा जोग भेल। विभिन्न आयोजनसभमे डोरिया…

तीनटा सम्बन्धपरक कविता

1. नानी

कतेको राग-उपरागक अछैतो
चुप्पे बिलहैत रहलै
अप्पन एकमात्र आमदनी
सूदिक पाइ
हम्मर माम सबहक भरण-पोषण मे,

मुदा
मामा लोकनि
भरित-पोषित भेलाक बाद
भ' गेलथिन एकात

मुदा
ताहि सँ कोनो खास फर्क नै पड़लैक
परिवर्तन बस यैह भेलैक जे
पहिले  खुअबैक पंचटकिया टॉफी
आ आब चारिअनिया लबनचूस,
चुप्पे, मामा सँ नुका कए
हम्मर ममियौत सब के,

मुदा
से कतेक दिन खुऔतैक
बुढ़िया पेलसिम मे
पाइये कतेक दैत छैक सरकार ?

2. दादी

अहाँक पक्का भुलकत रोइयाँ
जखन स्पर्श करत दादी
अहाँक हाथक कंगुरिया आँगुर के,
कियैक त' ई स्पर्श
सिर्फ ओकरे स्पर्श टा नहि छैक
ई दू शताब्दीक स्पर्श थिकैक
जकरा अंगेजने अछि दादी
अप्पन झूर-झमान भेल लटकल
मुदा दपदप करैत चमड़ी मे

दू शताब्दीक दू टा पीढ़ीक मिलान पर
ठाढ़ हेबा सँ पहिने
ओ रहैक एन-मेन हमरे-आहाँ सन,
ओकरो रहैक मनोरथ
जे बाबा आजीवन रखथिन्ह संग
आ ओहो हेतैक ताहि प्रवाह मे प्रवाहित
जाहि मे होइत छथि कोनो सामान्य स्त्रीगण
मुदा बाबा
से नै पुरौलथिन आस,
संग के कहय
अन्तिमों क्षण मे
नहि सामीप्य भेलैक प्राप्त,

आ ताहि दिन सँ दादी
भ' गेल अछि एसगर
मुदा ई बात कहैत नहि छैक ककरो
बेटा सब छथिन पढ़ल-लिखल
मुदा नहिए सन पढ़ि पबैत छथि दादी के

मुदा
दादी पढ़ैत छैक सबटा
दाद…